НАЗАД


Дело 8.                       1555.02.15

Привилей всим мещаном Белое Церкви на волност от даваня всяких капщизнъ и подачокъ до десети лет.

Жыкгимонътъ Августь, Божъю м(и)л(о)стью корол полский, великий князь литовский, руский, пруский, жомоитъский, мазовецкий и иныхъ.

Чынимъ явно симъ нашимъ листомъ.

Што ж зъ волею а росказаньемъ нашим воевода киевский, державца чорнобыльский, князь Фредрих Глебовичъ Пронский збудовалъ замокъ нашъ на украине именемъ Белую Церковъ, где при томъ замку нашомъ немало вже бояр и мещан домами своими осели.

А такъ, мы, г(о)с(по)д(а)ръ, хотячи тымъ подъданымъ нашимъ бояромъ и мещаномъ ласку нашу вделати, зачимъ абы и на передъний часъ тымъ большь людей ку оселости тамъ до того замку нашого Белое Церкви приходили

// [лист 9]
з особливое ласки нашое г(о)с(по)д(а)ръское дали есмо и тымъ листомъ нашимъ даемъ всимъ бояромъ и мещаномъ, подданымъ нашимъ, того замку нашого Белое Церкви, которие вжо теперъ домами своими тамъ мешкають и напередъ приходити и при томъ замку нашомъ оселости свои мети будуть, волности оть всих платов и подачокъ, и отъ плаченья капъщизны с корчомъ, и отъ иных всих роботъ и послугъ, которие бы они ку тому замку нашому Белое Церкви з оселостей своих повинни полнити, вызволяемъ и волными чинимъ до певного часу, то естъ на десять летъ, почон от свята пришлого Великодня, которое свято будеть в року лета Божего нароженья тисеча пятсот пятьдесят пятого году, ажъ до того жъ свята Великодня, которое будеть в року лета Божего нароженья тисеча пяотсот шестдесят пятомъ году.

Мають тые бояре, мещане и вси подданые наши места нашого Белое Церкви черезъ тую десять летъ отъ всих тых платов вышеймененых, и роботъ, и послуг замковых волни быти. А врядъ замку нашого Белое Церкви яко тых платов и подачокъ на них брати, такъ тежъ и ку роботамъ и послугамъ ку замку Белое Церкви их приворочати и притягивати не мають. Але в тьис всих поплатех, подачьках, роботах и послугах волно и спокойно они отъ нас, г(о)с(по)д(а)ръя, и тежъ оть вряду того замку нашого Белое Церкви черезъ тотъ часъ десят летъ захованы быти мають. А кгды тая десять леть в томъ листе нашомъ вышейописаная выйдеть, на он часъ мы, г(о)с(по)д(а)ръ, по вышътью тое вольности их маемъ водъле воли нашое, што слушъного намъ ся видеть будеть, платы, подачки и роботы на тых подданых наших замку нашого Белое Церкви ку пожитку нашому постановити.

И на то есмо [дали] бояромъ и мещаномъ и всимъ подъданымъ нашимъ места нашог[о] Белое Церъкви сесь нашъ листъ з нашою печатью.

П(и)санъ у Вилни, лета Божего нароженья тисяча пятсоть пятдесятъ пятого, м(е)с(я)ца

// [лист 9 оборот]
февраля пятогонадцать дня.

Подъписъ руки его м(и)л(о)сти пана Миколая Радивила, воеводы виленьского, маршалка земского, канцлера Великого Князьства Лит(о)вског[о].

 

Hosted by uCoz