НАЗАД


// [лист 58]

Дело 48.                       1559.05.02 / 1560.09.26

Сознане Михайловое Шембелевое Зофеи Яновны Теличанъки именем мужа ее и своим листу, запису их, Станиславу Рокицкому и жоне его, матце ее, даного, на заставу некоторых имений их Линъкова и Линковки Малое и инших двух частей в певной суме п(е)н(е)зей.

Лета Бож(его) нарож(енья) 1560, м(е)с(я)ца сенътебра 26 дня.

Пришедъши до книгъ канъцлерейских г(о)с(по)д(а)ра короля его м(и)л(о)сти и великого князя Жикгимонъта Авъгуста и постановивъшися очевисто земянъка его кролевъскей м(и)л(о)сти Зофея Яновъна Матеевича Теличанъка, оповедала и сознала то доброволне до книг г(о)с(по)д(а)рьских канъцлерейских именемъ своимъ, [и] именемъ мужа своего Михайла Себестыяновича Шемъбеля. О томъ, ижъ две части всих именей своих отьчизных и дедизных, властъных, которые на нее правомъ прирожонымъ по отьцу ее небожчику Яну Матеевичу Тельцы спали и пришли, то естъ двора Линъковъского и з частью местечка Линъковъского, в которой части домовъ местъских осмъ естъ, и с пустовъщинами тамошъними, в которых, дей, еще з учасники ее поровънанъя ей вечного нетъ, и с подаванъемъ костелнымъ, и со въсимъ кгрунтомъ земленымъ, такъ же и въ малой Линъковъце, которые именья лежать в повете Троцкомъ у волости Упитьской, и тежъ которые она люди и земли пустовские и ку тому часть четъвертую бору Керъновъского у Оръянах маеть, а особливе дворъца своего Островского з будованъемъ дворънымъ, з бояры путъными, и з людми данными и

// [лист 58 оборот]
тяглыми, и з служъбами их и со въсими доходы и пожитки, з них приходячими, зоставила земенину г(о)с(по)д(а)рьскому Станиславу Миколаевичу Рокицкому и жоне его, матьце своей, Баръбаре Марътиновъне, и детемъ, и потомъкомъ ихъ у певъной суме пенезей, то есть у трохсотъ копах грошей личбы литовъское, личачи по десяти пенезей у грошъ. На шъто жъ она и листъ свой зоставъный подъ печатью своею и подъ печатью мужа своего, и тежъ подъ сведомомъ и печатьми некоторых людей добрых ему на себе дала. В котором листе заставъномъ, на то ему даномъ, ширей и достаточней то описано естъ. Который же она листь свой у книг его кролевъское м(и)л(о)сти покладала и просила, абы тое сознане и листь ее заставъный до книгъ его кролевъскей м(и)л(о)сти былъ описанъ. Который жо листь ее заставъный, на то ему даный, слово отъ слова такъ ся в собе маеть:

«Я, Зофея Яновъна Матеевича Теличанъка, з мужомъ моимъ Михаломъ Себестыяновичомъ Шемъбелемъ, земяниномъ г(о)с(по)д(а)рьскимъ повету Ковенъского, чинимъ явъно сами на себе тымъ нашимъ листомъ, кому будеть потребъ того дела ведати або, чтучи его, слышати, нинешънимъ и напотомъ будучим.

Которые именъя и люди отьчизные и дедизные спадкомъ прирожонымъ на мене, Зофею, спало по отьцу моему небожъчику Яну Матеевичу Телитича, то есть: дворъ Линъково и з частью местечка Линъковъского с подаванъемъ костелнымъ и з землями вшелякими

// [лист 59]
и Малая Линъковъка у повете Троцкомъ волости Упитской з людми тых именей Линъковъских, то естъ: Мац Милошевич, служба, з братомъ его Петрелемъ; а у Малой Линъковъце Будгринъ и з сынми своими, служба; Анъдрей Чеботаръ и зъ сынъми своими — люди прихожие — служба; Мац Буиволъ з сынъми, служба; и две пустовъщине в Линъкове подле местечка на ймя Будкгинишки а Вапишъский, у которых еще поровнанъя неть, и з частью местечка Линъковъского, у которомъ есть осмъ домовъ; к тому у Оръянах подле Керънова служба людей Ясох Михновичъ и з сынъми его, а пусътовъщина на ймя Павъловъщина тамъже близу Керънова, межи людми паней Миколаевой Сонъкголовой а пана Яна Олехновича, и четверътая часть бору тамъже подле Керънова близу реки Вельи; у повете Виленъскомъ дворец Островъ з людми, службу служащими и данъ дающими, которых людей островъскихъ имена то суть: люди путъные Прекудовичи, служба, а людей тяглых Семенъ Яроховичь з братаничи и з сынъми, служба, и при томъ ч(о)л(о)в(е)це уступъ у пущу Ожу, Марътинъ Гаковичь и з сыном Кузмою, служба, а прихожих людей, которые седять подле двора, два ч(о)л(о)в(е)ки: на ймя Бонис Жомойтинъ и з сынъми его зъ Янелемъ а Юръкгелемъ, служба, Янелис и з сыномъ, служба; а в Руском селе пустовщина на ймя Исаевъщина.

А такъ, я, Зофея вышеймененая, з мужомъ моимъ, Михаломъ Себестыяновичомъ Шемъбелемъ, кром жадного припуженъя ани с чией намовы, лечь сами з доброй воли, тых всих именей моих отъчизных вышейписаных, то естъ: у Линъкове и въ Малой Линъковъце, подле Керънова у Оръянах, и у Острове кгрунъту, пашъни дворъное, людей путъных и тяглых,

// [лист 59 оборот]
службу служачих и данъ дающих, мещанъ, и пустовъщинъ, будованъя всякого у тых именъях вышейречоных, пашъни дворъное, селищъ, навозовъ, всих земль оремых и не оремых, сеножатей, болотъ, гаевъ, лесовъ, дубровъ, прудовъ, прудищъ, гоновъ бобровьис и всяких лововъ, што-колвекъ ку тымъ именъям моимъ прислужаеть и што мне досталося по небожъчику отьцу моемъ, тых всих именей две части, яко ся в собе мають, ничого не зоставуючи на себе, заставили есмо пану Станиславу Рокицкому и жоне его, матъце нашой, паней Баръбаре Мартиновъне, и детемъ их за триста копъ грошей личбы литовское.

Маеть панъ Станиславъ, жона и дети их во въсих тых именъях две части деръжати и их уживати, поки мы сами або близкие наши тую суму пенезей, триста копъ грошей, сполна отъдадим, а не отъдавъши пенезей сполна, не маемъ ничимъ у тые две части тых именей уступатися, мы сами ани потомки наши и никоторые близкие наши. А естли быхмо яко-колвекъ в то ся уступили пенезей не отъдавъши, маемъ платити вины г(о)с(по)д(а)рю королю его м(и)л(о)сти двадъцать рублевъ грошей, пану воеводе виленъскому дванадъцать рублевъ грошей, пану Станиславу Рокицкому тые пенези совито платити, шкоды и наклады вси оправити, штобы для того шкодовалъ. А третюю часть тьх именей перъвей сего пану Рокицкому и жоне его на вечьность ему спустили. То онъ маеть деръжати ведлугъ первого запису нашого. Што ся дотычети именья Островъского, на тотъ час кгды есмо зоставили будованъя а севъбы никоторое не было, одъно пашъня го

// [лист 60]
лая, и на шъто панъ Рокицкий прибавить в томъ именю Островъскомъ, то на себе ку третей части маеть одеръжати, а намъ або близкимъ нашимъ одно голую пашъню маеть поступити такъ, яко есмо голую заставили.

На которую жъ тверъдость я, Зофея Яновъна, споломъ з мужомъ моимъ, Михаломъ Себестыяновичомъ, дали есмо пану Станиславу Рокицкому и малъжонъце его, матъце нашой, сесь нашъ листъ подъ нашими властъными печатьми. И к тому просили есмо зацных пановъ: пана Станислава Голубицкого, подъстаростего ковенъског[о]; пана Михала Юшъкевича, судью ковенъского; пана Яна Яневича Выдру, хоружого ковенъского; а пана Миколая Юръевича Володъкевича. Ихъ милость на нашу прозбу печати свои приложили к сему нашому вызнаному листу.

На шъто жъ я, Зофея, з малъжонъкомъ моимъ, Михаломъ, дали есмо пану Станиславу Рокицкому и жоне его, паней Баръбаре, сесь нашъ листъ подъ нашими печатьми и подъ печатьми тых пановъ верхуписаных.

Писанъ у Ковъне, под лет(ы) Бож(его) нарож(енья) тисеча пятьсоть пятьдесятъ девятого году, м(е)с(я)ца мая второго дня.

Michal Szembel wlasna reka ».

Которого жъ ее оповеданья и до книгъ г(о)с(по)д(а)рьскb[ канъцлерейских в той речи записанъя Станиславу Рокицкому выписъ с книгъ его кролевъскей м(и)л(о)сти канъцлерейскихъ есть дан.

Писанъ у Вильни.

Hosted by uCoz