Дело 47. 1560.07.18
Лист бояром мстиславскам Левону а Степану Зеньковичом, до старосты мстиславского писаный, зоставуючи их при двух землях пустовских: селищу Кузнецовском а земли Кононовщине, до воли г(о)с(по)д(а)ръское.
Жыкгимонътъ Авъгустъ, Божъю м(и)л(о)стью корол полский, великий княз литовъский, руский, пруский, жомойтский, мазовецкий и иных.
Старосте мъстиславъскому и радомълскому князю Ивану Василевичу Соломерецкому.
Били намъ чоломъ бояре повету Мстиславъского на ймя Левонъ а Степанъ Зенъковичи и з братею своею и поведили
передъ нами о томъ, што жъ первшие старосты наши мстиславъские, то естъ князь Василей Анъдреевичь Полубенъский а
сынъ его княз Иванъ Полубенъский, будучи тамъ во Мъстиславли отъ нас, г(о)с(по)д(а)ра, старостами, дали имъ на
служъбе нашой г(о)с(по)д(а)рьской и земъской, военъной две земли пустовъских: на ймя селищо Кузнецовъское а
землю Кононовъскую со въсимъ, яко ся тые земли в собе мають. И к тому дворъное пашни Доброселское, такъжо
пустовъское селищо церъковъное с прудищомъ и з мутъвицею они имъ придали. Где жъ они и листы их, на тые земли
пустовъские и селищо имъ даные, в себе мають. За которыми, дей, листы их они то спокойне до сего часу на себе
деръжать и служъбу нашу земъскую, военъную намъ, г(о)с(по)д(а)ру, с того служат. Которые жъ листы их, на то
имъ даные, передъ нами они показывали и били намъ чоломъ, абыхмо ласку нашу г(о)с(по)д(а)рьскую имъ вчинили, при тых
землях их зоставили и на то листъ наш
А такъ, мы, чинячи в томъ имъ ласку нашу г(о)с(по)д(а)ръскую, за чоломъбитьемъ ихъ при тыхъ двухъ земляхъ вышеймененых Кузнецовъщине и Кононовъщине и при селищи, дворное пашъни Доброселское подле листовъ, на то имъ оть старостъ наших мстиславъских князей Полубенъских даных, на тоть час до воли и ласки н(а)шое г(о)с(по)д(а)рьское зоставуемъ. И приказуем тобе, штобы еси с тых земль пустовъских и селища, вышей меновите описаного, на которомъ они тепере домами своими седять, и, чого в держаньи будучи, службу нашу и земъскую, военъную намъ, г(о)с(по)д(а)рю, служать, их не рушалъ и никоторое трудности и переказы в томъ имъ не чинилъ, до иное науки и росказанья нашого г(о)с(по)д(а)рьского конечно. А они с тых земль своих мають намъ, г(о)с(по)д(а)рю, служъбу нашу и земъскую, военъную служати подле листов старостъ наших мстиславъских, князей Полубенъских, на то имъ даных
А ведъжо хочемъ то мети, абы еси выведавъшися достаточне о тых землях их, яко ся в собе мають и яко много они подъ собою того кгрунъту деръжат, до насъ отъписалъ и ведомость достаточную намъ в томъ писанъемъ своимъ уделалъ. А мы, вырозумевъши тому с писаня твоего на онъ час то, естъли ся намъ, г(о)с(по)д(а)ру, будеть за справою в томъ отъ тебе даною, за слушъно без шкоды кгрунъту того замку нашого Мстиславъского видети, оные земли вышейпомененые будемъ хотети казати имъ листомъ нашимъ потверъдити.
Писанъ у Вилни, лет(а) Бож(его) нарож(енья) 1560, м(е)с(я)ца июля 18 дня.