Дело 43. 1558.04.12
Привилей войту киевскому Семену Мелешковичу, потвержене купли его, земель, названых Юревъцы, и острова Чатанова, навечность, у земян киевскнх купленыхъ.
Жыкгимонт Авъгустъ, Божъю м(и)л(ос)тью и далей....
Ознаймуемъ симъ нашимъ листомъ.
Билъ намъ чоломъ войтъ места нашого Киевъского Семенъ Мелешъковичъ и поведилъ передъ нами. Ижъ он купилъ собе навечность у земянъ повету Киевъского на ймя Богдана Степановича Дубълянъского и в сестры его Феди Золотушинъны землю их властъную отъчизную у повете Киевъскомъ на ймя Юръевцы на речце Вете, обапол тое речки Веты, за пятьдесятъ коп грошей личбы и монеты литовъское.
А у Льва Ивановича Волъковича и жоны его Марины Борисовъны землю их властъную, выслугу отъца их Ивана Волковича, островъ на речце Десне на ймя Чатановъ, и з селищомъ, к тому острову прислугаючимъ, за шестьдесятъ копъ грошей личбы и монеты литовъское, со въсими земълями пашъными и непашъными, с польми и сеножатьми, з лесы и з зарослями, з гаи, з дубъровами, и з деревомъ борътнымъ, с озеры и озерищи, з реками и з речишчами, сътавы и з ставищи, и с крыницами, з ловы зверинъными, пташими и рыбъными, и з езами речными, и с котцами, и гоны бобровыми, и со въсякими инъшими входы и пожитъки с тых земль
Которые онъ листы их на тую куплю свою отъ них ему даные передъ нами покладалъ и билъ намъ чоломъ, абыхмо в томъ ласку нашу г(о)с(по)д(а)рьскую ему вделали и тые земли, вышей меновите описаные, куплю его, подле тых листовъ продажъных тых земянъ наших киевъских: Богдана Степановича Дублянъского и сестры его Феди Золотушинны, а Лва Ивановича Важовича и жоны его Марины Борисовны листомъ нашимъ потвердити ему казали.
Яко жъ и воевода киевъский, деръжавъца коръмяловъский, панъ Григорей Алексанъдровичъ Ходъкевича в томъ нас у причине за нимъ жедалъ.
А такъ, мы, тых листов их купчих огледавъши, з ласки нашое на жеданъе пана воеводы киевъского и на чоломъбитье того войта нашого киевъского Семена Мелешъковича то есмо вчинили: при тых землях, вышей меновите описаных, Юревъцах и острове Чатанове, со въсимъ, яко ся они здавъна в собе мають и яко жъ их тые земяне наши киевъские вышеймененые спокойне то на себе, яко властъность свою держачи, ему продали, подле оных листов его купчих есмо зоставили и симъ листомъ нашимъ его зоставуемъ и то навечность ему потвержаемъ.
Маеть онъ самъ, жона, детям и потомки их тые земли Юръевъцы и островъ Чатанов, со въсимъ яко ся тые земли сами в собе и въ границах, и въ пожитъках своих здавъна мают, водле купли и листов своих купчих на себе держати и того вживати. А намъ, г(о)с(по)д(а)ру, с того они службу служити мають потому жъ, яко перед тым с тых земль вышеймененых служъба намъ, г(о)с(по)д(а)ру, до замку нашог[о] Киевъского бывала служона.
И на
Писан у Вильни, леот(а) Бож(его) нарож(енья) 1558, м(е)с(я)ца апрея(я) 12 дня.