Дело 16. 1555.08.12
Лист боярину Добошенскому Гришку Козловичу на зешшцу в Добосне у Брыковичах, до воли г(о)с(по)д(а)ръское.
Жыкгимонътъ Авъгустъ, Божъю м(и)л(о)стью король польский, великий князь литовский, руский, пруский, жомоитский, мазовецкий и иных.
Деръжавцы глушскому и быховскому князю Ивану Васильевичу Соломирецкому.
Билъ намъ чоломъ бояринъ нашъ добышенъский державы твоее на ймя Гришко Трошкевича Козловича и поведилъ передъ нами, ижъ ты за прозбою его далъ ему ку земли его в Добосне землицу пустовъскую, заросль, на ймя у Бриковичах на плате нашомъ г(о)с(по)д(а)ръскомъ держати на дванадъцати грошех, на што онъ и листъ твой в себе маеть. И передъ нами его указывалъ и билъ намъ чоломъ, абыхмо ласку нашу г(о)с(по)д(а)ръскую вчинили, а при той землицы у Добосне его водле листу твоего зоставили.
Ино кгды.ж будеть тая землица у Бриковичах в пусте лежала, а пожитку и плату намъ з нее не бывало, мы того Гриш[ка] Казловича при той землицы у Добосне на имя у Бриковичах зоставили. Нехай онъ самъ и его жона, и дети тую земълицу водлугъ листу твоего до воли и ласки нашое г(о)с(по)д(а)ръское на себе деръжать и ее вживають, а в кождый годъ с того плату на насъ, г(о)с(по)д(а)ря, по дванадъцати грошей платить.
И ты бы, княже Иване Соломерецкий, и напотомъ будучие державцы наши глушские и быховские о томъ ведали и его в томъ водле того листу и росказанья нашего спокойне заховали конечно, абы то инакъ не было.
П[и]сан у Вильни, лета Божег[о]
// [лист 18]
нароженья 1555, м(е)с(я)ца авъгуста 12 день.