НАЗАД


Дело 11.                       1554.06.01 / 1555.03

Потвержене Яну Белозору на некоторие именя въ земли Жомойтской: имене в Сарвах и дворец у Ворненах вечностю, а на Руси, в Полоцку, имений и дворов в суме п(е)н(я)зей ему от Никифора Григоревича Ловейковича тестаментом записаных.

Жыкгимонътъ Августь, Божъю м(и)л(о)стью король польский, великий князь литовский, руский, пруский, жомоитский, мазовецкий и иных.

Чинимъ знаменито симъ нашимъ листомъ, хто на него посмотрить або, чтучи его, услышить, нинешнимъ и напотомъ будучимъ, кому будеть потреба того ведати.

Билъ намъ чоломъ дворанинъ наш Ян Войтеховичъ Белозор и поведилъ передъ нами, ижъ дворанинъ нашъ

// [лист 11]
Никифоръ Григоръевичъ Ловейковича, а прозвищомъ Михайло, обачивши его яко кровного своего ку собе межи всими кровными иншими и повиноватыми своими особливе быти схилнейшого, сприязливъшог[о] и услужнейшого, и, хотячи тые сприязливые склонности и заслуги его водле можности своее охотне ему нагородити и всимъ добримъ отъдати, а тымъ на потомъные часы его сприязлившого собе сповиноватити, а з народу своего не маючи никоторого плоду ани потомства, безъ кождого припуженья и намовы чией-кольвекъ, лечъ самъ по своей доброй воли, будучи в зуполномъ розуме, памети и здоровъи своемъ, уживши в томъ порады приятелей своих, взялъ его собе за властного а родимого сына и опекуна души своее и записалъ ему именье свое отъчизное в земли Жомоитской на ймя в Сарвах дворъ з людми и местечко и тежъ Ворнянах дворецъ и люди со всимъ на все, яко ся оное именье в Сарвах з местечкомъ и дворецъ у Ворнянах з людми и со всими повиноватостями своими з давных часовъ в собе заховываеть, и к тому вси речи свои рухомые отъ мала и до велика навечность, ничог[о] во всемъ томъ на иншие кровные, близкие и прирожоные свои не зоставуючи ани выймуючи, ему далъ и записалъ.

И тежъ тотъ же Никифоръ Григоръевичъ за властные долги свои, которими ся онъ ему былъ отъ немалого часу порозну задолжилъ, ошацовавши вси тыи долъги свои справедливымъ шацункомъ своимъ, такъ много яко тисячу копъ грошей, записалъ ему такожъ за листомъ своимъ тую суму пререченую тисячу копъ грошей на личбу Великого Князьства Литовского, по десяти пенезей у грошъ, личачи на йменъях своих отъчизных в Полоцкомъ повете на ймя на Сволме реце и на Дърисою рекою дворъ и люди, села и зъ приселки, то ест: в Кохановичах, в Зодержи, в Старосельи, на Долгомъ, на Оръме Голубовщину, в Стоговичах и въ Тоболках дворец з людми, а к тому в замку Полоцкомъ дворъ, а другий дворъ в замку Дрискомъ, а третий дом передъ замкомъ

// [лист 11 оборот]
со всимъ потому, яко ся тые именья села и зъ приселки стародавна в границах, в обыходех и в обрубах своих мають. На што жъ ему и листъ свой записный подъ печатью своею и тежъ подъ сведомомъ и печатьми некоторых пановъ радъ и врадниковъ наших далъ. Которий листъ Янъ Белозоръ передъ нами покладалъ и билъ намъ чоломъ, абыхмо ласку нашу г(о)с(по)д(а)ръскую вчинили и в томъ его водле тых листовъ записовъ его заховали, и на то дали ему нашъ листъ и потвердили листомъ нашимъ навечность. Который листъ его записный в слово отъ слова такъ ся в собе маеть:

"Во ймя Светыя живоначалныя Тройцы: Ойца, Сына и Духа Светого ныне и завжды и въ веки векомъ.

Я, рабъ Божий Никифоръ, а зъ прозъвище Михайло Гринкевичъ Ловейковича, пишу тоть мой тестаменъть безъ жадного припуженья и безъ жадного намовенья, своимъ целымъ розумомъ и остаточною моею доброю волею, кому будеть того потреба ведати альбо, читаючи его, слышать.

Которое мамъ имене свое отъчизное в Жомойти на ймя в Сарвах, дворъ и люди, и местечко, у Ворнянах дворец и люди, такъ зо всимъ, яко ся тое именье мое само в собе маеть, то естъ третея часть всее отъчизны мое, тое именье свое дарую и записую по животе своемъ на вечные часы сыну моему Яну Войтеховичу Белозору.

А которое именье свое отъчизное маю в Полоцкомъ повете на Сволме реце и на Дрисою рекою дворъ и люди, села и приселки в Кохановичах, Задержи, и въ Старосельи, на Долъгомъ, на Оръме Голобовщизна, в Столовичах и в Тоболках дворец и люди, и въ Полоцкомъ замку дворъ, и въ Дрискомъ замку дворъ, и передъ замкомъ другий дворъ, то мое именье зо всимъ на все такъ, яко ся в собе маеть, то естъ две части всее отъчизны моее, записую суну [Прим: требуется читать "сыну"] моему Яну Войтеховичу Белозору в тисячу копах грошей литовъской монеты. Бо я тые грошы

// [лист 12]
у него бралъ и позычалъ на свои пильные потребы, ездячи на украины и накладаючи на частыей послуги г(о)с(по)д(а)ръские ачъ-кольвекъ не одъным разомъ, але коли двесте копъ грошей, а иногды по триста копъ грошей, а другого тежъ часу по чотырыста копъ грошей у него браломъ.

А шаты мои и зброи мои вси записую по животе моемъ сыновцомъ моимъ Войтеху а Анъдрею Войтеховичомъ Белозоромъ на ровный поделъ. Ручъницы и гаковницы, алебарты - сыну моему Яну Белозору. Со два возы древца, таръчипеер и деки конские - Войтеху а Андрею Белозоромъ на ровный делъ. По животе моем стадцо мое свирепъе и животина рогатая и нерогатая, и увесь статок мой домовый - сыну моему Яну Белозору.

А челядь моя неволная вся отъ мала и до велика якожъ-кольвекъ набыта по моемъ животе абы была вольна: кому будеть хотеть, тому нехай служать. А хто их иметь неволит собе, тоть ся розсудить зо мною передъ милымъ Богомъ на страшливомъ суде.

Баръва моя люнская, доломаны, и дылеи, и шапки - служебником моимъ тымъ, которие отъпровадять грешное тело мое до Киева, а к тому тежъ по коню: старшому старшого, а меншому меншого. И дъяку моему Опанаску и самъ абы былъ воленъ: кому похочеть, тому нехай служит.

А Петрику Мякостыпу, хлопъцу моему - варстатъ мой увесъ маляръский и римарский, фарбы и образы, и труба московъская. И самъ абы был волен: кому похочеть тому, нехай служить.

Кухарки мои наемные и шинкарки абы были добре отъправены за их службы.

Ризы мои одомашковые и стыхар, и патрахел на церковъ Пречистое светое Печерское. И где положать грешное тело мое, и газуки мои чамлету бурнатъног[о]. Абы ризы уделаны до светого Миколы Вышогородского. И книги мои вси розъдать по церквамъ, которая будеть которое книги потребоват.

А пану Ивану Одер должен естемъ пятьдесятъ грошей безъ двухъ

// [лист 12 оборот]
литовъское монеты, то маеть сынъ мой Ян Белозоръ ему заплатит.

А которое именьечько мое отъчизное меломъ у Берестейскомъ повете у Пужичах, то ми взято на г(о)с(по)д(а)рья безъвинне и безъправне. Хто жъ взялъ и держить, тотъ ся розсудить зо мною передъ милымъ Богом на страшномъ суде.

А душею моею маеть ся печаловати сын мой Ян Белозоръ, яко ему панъ Богъ положить по серцу. А грешное тело мое абы было положоно у манастыры Светое Пречистое Печерское.

А хто тотъ мой тестаментъ рушить, тотъ ся розсудить зо мъною передъ милымъ Богомъ на страшномъ суде.

А для лепшого сведомя и твердости того моего тастаменъта просиломъ его м(и)л(о)сти пана троцкого, старосты жомойтского, деръжавцы плотельского, тельшовского и вилкейского, пана Еронима Алекъсандровича Ходъкевича; а пана Станислава Станиславовича Довойна, воеводы полоцкого; а пана Яроша Корицкого, конюшого г(о)с(по)д(а)ръского, деръжавъцы трабского и воложинского; а пана Петра Веселовъского, обозного г(о)с(по)д(а)ръского, державцы мстибоговъского и болницкого, и симъненьского; а князя Анъдрея Озерицкого, старосты оръшинъского; а пана Бобоеда Васильевича, старосты утенского; а пана Войтеха Юръчинъского, писара скарбного г(о)с(по)д(а)ръского; а дворанина г(о)с(по)д(а)ръского пана Яцка Московича о приложенье печати. И их м(и)л(о)сть на мою прозбу то вчинили и печати свои приложили. И я, Михайло Гринъкевичъ, и свою печать приложиломъ к тому моему тестаменту.

П[и]санъ у Вильни, року Божего тисяча пятьсотъ пятьдесятъ четвертого, м(е)с(я)ца июня дня перъвшого, индикта дванадъцатог[о]".

Ино мы, бачечи в томъ прозбу того дворанина нашого Яна Белозора быти слушную, а наболей, ижъ ся тоть Никифоръ Григоревичъ,

// [лист 13]
ни в чомъ права посполитого и статуту земского не отступуючи ани его ображаючи напротивку его яко то кревного своего, на записе своемъ заховалъ, з ласки нашое на его чоломъбитье то есмо вчинили: и на то ему дали сесъ нашъ листъ, и тое именье в земли Жомоитской в Сарвахъ, двор з людми, и со въсими пашнями, и местечко, и тежъ дворецъ у Ворьненах, и тежъ вси речи рухомые, што ему тотъ Никифоръ навечность записалъ, и тежъ тую суму тисячу копъ грошей, которую онъ же ему на именьях на селах и приселках, и дворех своих вышей меновите описаных, в повете Полоцкомъ, до зуполное заплаты отъ инших кровных и прирожоных своих записомъ своимъ записал Яну Белозору самому, жоне и их детям и напотомъ их будучимъ щадъкомъ, потвердили имъ нашимъ листомъ вечно и навеки, непорушно ему потвержаемъ.

Мають они тое именье в земли Жомоитьской в Сарвах, дворъ и местечко, и тежъ дворец у Ворнянах с пашнями дворными, со всими речми рухомыми, з боярми и слугами путными, з людми тяглыми и зъ их землями, с пустовъщизнами, з сеножатьми, болоты, гаи, лесы, з реками и речками, ставы и ставищи, з млыны и зъ их вымелки и со всими иными поплаты, пожитки и доходы, которие с тых именей и местечка вышеймененого приходять, и со всимъ с тымъ, яко ся тые именья и местечко в Сарвах здавных часовъ в границах, межах и въ в обрубех своих заховывають, водъле листу запису того Никифора держати и того вечными часы вживати. И волни они на то отъдати, продати, задати, заменити, и ку своему лепшому а ужиточнейшому обернути.

И тежъ оные именья в повете Полоцкомъ на ймя на Сволме реце и на Дърисою рекою дворъ, люди, села и приселки, то естъ в Кохановичах, в Задежи, в Старосельи, на Долгомъ, на Орме, на Гулобовъщизне,

// [лист 13 оборот]
в Столовичах и въ Тоболках дворецъ зо всими людьми тяглыми и данники, и дворъ в замку Полоцкомъ, а другий дворъ в замку Дрискомъ, а третий дворъ передъ замком в той суме преречоном, у тисячу копах грошей на личбу Великого Князства Литовского, до зуполное заплаты отъ инших кровных и прирожоных Никифоровых держати и уживати и кому хотя тую суму пререченую на тых именьях, селах и приселках, и на дворех записати водълугъ листу оного Никифора Григоръевича. А близкие и кровные того Никифора жадное переказы в томъ имъ надъ тотъ лист его делати не мають, але во всемъ спокойливе ся в томъ к нимъ мають заховывати.

А Янъ Белозор и его жона, и их дети и потомки, держачи тые именья вышеймененые, намъ, г(о)с(по)д(а)ру, с того службу земскую военьную служити маеть.

А на твердость того и печать нашу казали есмо привесити к тому нашому листу.

П[и]сан у Вильни, под леты Божего нароженья тисяча пятьсотъ пятьдесятъ пятого, м(е)с(я)ца марта __ дня.

 

 

Hosted by uCoz