Дело 14. 1555.06.10
Привилей Юрю Быковскому на корчму волную в ыйменю его Степкове, у борку, над болотом Сасиновымъ.
Жыкгимонътъ Авъгустъ, Божью м(и)л(о)стью король польский, великий князь литовский, руский, пруский, жомойтский, мазовецкий и иных.
// [лист 15 оборот]
Чинимъ явно симъ нашимъ листомъ.
Билъ намъ чоломъ дворанинъ нашъ Юръи Янушовичъ Быковъский и просилъ насъ, абыхмо ласку нашу г(о)с(по)д(а)ръскую вчинили и дозволили ему в ыменьи его Степкове, у борку надъ болотомъ Сасыновымъ, корчму волную будовати и в ней медъ и пиво, и вино горелое мети и шинъковати. А поведилъ передъ нами, ижъ тое именье его Степково поодаль месть наших г(о)с(по)д(а)ръских есть и тая корчма его безъ шкоды корчмамъ нашимъ будет.
Ино мы з ласки нашое г(о)с(по)д(а)ръское на чоломъбитье его то вчинили: дозволили ему и тымъ листомъ нашимъ дозволяемъ и даемъ в том именьи его Степкове, у борку надъ болотомъ Сасыновимъ, корчму вольную збудовати и в ней медъ, пиво и горелое вино добровольне держати и тымъ безъ шкоды корчомъ наших шинковати.
И маеть Юрьи Янушевичъ Быковъский и его жона, и их дети и потомки с тое корчмы в томъ именьи своимъ Степкове платъ - капъщизну, который бы тамъ с тое коръчмы мелъ приходити, на себе брати, на вечные часы.
А на то дали есмо Юръю Янушевичу Быковъскому сесь нашъ листь з нашою печатью.
П[и]санъ у Петрькове, под лет(а) Божего нароженья 1555, м(е)с(я)ца июя(ь) 10 денъ.